- علينا تعليم الأطباء، خصوصاً أطباء الأطفال، أن يدعموا ما نعلمه في المنزل والمدرسة وهو أن عليه أن يسأل الأم إذا كان بإمكانه خلع ملابس الطفل للكشف عليه أم لا.
- كتير نقول لأولادنا يبوسوا حد بالعافية (ما تتكسفش) أو احضني عمو. لو الطفل مش عايز يحضن أو يبوس حد مش لازم نضغط عليه.
- شجع أولادك يقولوا لك كل حاجة وأي حاجة في الدنيا وانت اتعلم تسمع حتى لو حسيت إنها حاجات هايفة لأن دا بيولد ثقة بينك وبين أولادك.
المنطقة دي المتحرش شاطر فيها جداًـ إنه يسمع للأولاد والبنات اللي أهاليهم مش فاضيين لهم فيكسب ثقةتهم كجزء من الإغواء.
- في أمان في الأعداد، يعني كل ما بقى أولادك مع أولاد تانية بيبقى احتمال التحرش أقل. Safety in numbers
- لو ابنك أو بنتك تاهوا وعايزين يسألوا حد، أحسن حد يسألوه هو أم مع أولادها (ولو ان حتى دول مش كلهم أمان).
- علمي أولادك أساليب للدفاع عن النفس.
- المدارس محتاجة توعي الأولاد والبنات بفصول منظمة.
محتاجين نكرر كلمات زي :
- عمر ما حد كبير تايه يسأل طفل.
- عمر ما حد كبير يسأل طفل عن كلب ضايع.
- ماما عمرها أبداً ما هتبعت حد تاني ياخدك من المدرسة إلا لما تقولك وتقول للمدرسة، حتى لو كان حد تعرفه قبل كدا. لازم دايماً يقولوا "لأ".
- ماما عمرها ما هتبعت وانتي راجعة من المدرسة يمشي معاكي وياخدك البيت، حتى لو حد تعرفية قولي لأ.
الأهم من دا كله انتبهوا للأولاد.
لما بنتك ترجع من المدرسة مقفلة وتسأليها في أيه؟ تقول لك ولا حاجة ممكن تسيبيها وتقولي دي هرمونات المراهقة...
لأ. ادخلي قوضتها وراها وقولي لها انك بتحبيها وانها ممكن تسألك أي حاجة وتتكلم معاكي في كل حاجة. واحده عملت كدا وفي الآخر بنتها سألتها البنت.. يعني أيه الواقي؟؟؟ ردت عليها الأم وسألتها بتسألي ليه؟
قالتلها ان ولد من المدرسة حاول يتحرش بيها وقالها المرة الجاية أحسن لك يكون معاكي واقي.
الأم قالت لبنتها تحبي أروح أنا المدرسة ولا انتي تقولي للمدرس؟ البنت قالت أنا أقول له.
المدرس مصدقهاش وزعقلها الأم راحت المدرسة تاني يوم وقالت له يبلغ عن الولد قبل ما يعتدي على حد وقالت له ان لو دا حصل فهيا هتشهد ان المدرس كان عارف من الأول.
لازم الأولاد يحسوا ان احنا بنساندهم... اننا في ظهرهم.
أهالي كتير ممكن مش ينتبهوا لعلامات زي :
- بنتك ترجع متغيرة.
- بنتك تبقى منطوية ومش عايزة تتكلم مع حد.
- بنتك تلبس بنطلونات بس وتخاف من الجيبات أو تبدأ تلبس واسع قوي علشان محدش يشوف تفاصيل جسمها.
- تبدأ تقعد في الوضع الـ curled position.
- تخاف تسيب البيت.
أحسن حاجة نعملها لأولادنا هي إنهم يثقوا في نفسهم، يثقوا فينا كأهل، إننا نحبهم محبة غير مشروطة.. ان الحب ده عمره ما هيتغير مهما مين قال لنا حاجة وحشة عنهم. لازم نتواجد لأولادنا ونقضي معاهم وقت.
ندرب نفسنا انه حتى لو حصل، فالأهل العاقلين اللي هيحبوا ويساندوا أولادهم، ممكن يفرق جداً في حياة الولد أو البنت.
انتظرونا الاسبوع الجاي بباقي الإرشادات والاحتياطات المطلوبة للحماية من التحرش عن طريق الإنترنت...
انتظرونا