كيفية التعامل الصحيح عند إبلاغ الطفل عن حالة تحرش :
كل الأبحاث أثبتت إن أهم حاجة بتحدد اذا كان الطفل هيعدي موضوع التحرش بدون أي آثار سلبية هو مدى مساندة الأهل للطفل وقت الحَدَث.
أكتر حاجة إيجابية ممكن نعملها هي اننا نصدق ونسانده نفسياً وعاطفياً.
كثير من الأطفال مش هيقولوا لأهاليهم غير لما يوصلوا سن المراهقة، أو بعد مرور فترة من الزمن.
الأهل يعملوا أيه؟
1 – احتفظ بهدوئك : بالرغم من دا أمر صعب لأن الأهل بينهاروا لما يعرفوا لكن مهم جداً إننا منعملش ردود فعل عنيفة لأن رد الفعل العنيف هيخوف الناجية/ الناجي ويخليهم يشعروا بخزي أكبر بكتييير. دا ممكن طفلك يقول انه محصلش عشان يحميك انت.
2 – صدق ابنك / بنتك. الأطفال مش بيخترعوا موضوع التحرش.
3 – اصغ لطفلك : ما تعلقش وهو بيحكي لك. متدينش المتحرش، في الغالب الطفل بيكون عارف المتحرش كويس وبيحبه كونك تشتم أو تذم في المتحرش هيضيف لشعور الطفل بالألم وعدم الارتياح.
4 – أكد لأبنك/ بنتك إنه معملش حاجة وحشة. التحرش عمره ابداً أبداً ما بيكون ذنب الطفل.
5 – اتأكد ان طفلك محمي من تحرش مستقبلي تاني.
6 – اطلب مساعدة ليك ولطفلك في أقرب فرصة.
7 – اتأكد ان الشخص اللي هتقعد معاه معندوش مشكلة انه يتكلم ويسمع ويعطي مشورة صحيحة في الموضوع دا.
لسلامة طفلك اتناقش معاه في الأمور دي.
-في أجازة الصيف لازم ماما وبابا يبقوا عارفين انت فين ومع مين وامته هترجع البيت.
-لما يكون عند حد من أصحابه اتأكد ان الأهل موجودين في البيت، ولو الأهل سابوا البيت وسابوا الأولاد لوحدهم، محتاج تقول للأولاد يعملوا أيه.. هل يطلبوك تيجي تاخدهم؟
-لو ابنك أو بنتك كانوا على الكمبيوتر وصورة وحشة ظهرت علم ولادك انهم يطفوا الكمبيوتر "الشاشة" ويقولوا لك.
-لو بتلعبوا في أي مكان، وشخص كبير قال لك تدخلي عنده وتلعبي لازم تقولي "لأ" وعلى طول تبلغي ماما أوبابا.